|
Il project « Rule of Law in Armed Conflicts » (RULAC) registrescha las legislaziuns naziunalas dal dretg umanitar e la giurisprudenza internaziunala en connex cun ils conflicts armads.
Impurtanta novitad en il mund giuridic: en l’avegnir èsi pussaivel d’acceder entaifer pauc temp ad ina vasta banca da datas online che „democratisescha“ aspects da legislaziun savens percepids sco inaccessibels al public causa lur cumplexitad e lur diversitad. Ditg pli precis: il project RULAC da l’Académie de droit international humanitaire et de droits humains a Genevra sustegna l’applicaziun dal dretg internaziunal en ils conflicts armads. In instrument solid ed util betg mo per giurists e professers, ma era per studentas e students ed organisaziuns internaziunalas e nunguvernamentalas.
Il project è ambizius; el fa in rapport da la situaziun giuridica da mintga stadi u mintga zona da conflict dal mund. I na sa tracta betg mo da far ina „carta umanitara“ dal mund, ma surtut – e là daventa quai cumplitgà – d’evaluar en tge mesira ch’il dretg vegn respectà dals acturs pertutgads. Da l’Afganistan a la Sambia, passond per la Finlandia ed il Tschad, la glista dals stadis è lunga. Per mintgin d’els vegn fatg in purtret giuridic che inditgescha lur engaschi en ils conflicts armads sco era detagls davart il rom giuridic naziunal. La pagina metta era a disposiziun preschentaziuns da sintesa dal dretg internaziunal umanitar, dal reglament internaziunal dals dretgs umans, dal dretg penal internaziunal e dal dretg internaziunal dals fugitivs. Questas noziuns, surduvradas savens, per part scumbigliadas, meritan en mintga cas ina explicaziun. Quai fa la pagina da maniera persvadenta ed ella propona numerus links che mainan vinavant. Per vegnir pli concret preschentain qua in exempel dal cuntegn da la banca da datas da la pagina RULAC.
Cumenzond cun il bustab A sco Afganistan scuvrin nus sco emprim ina pitschna preschentaziun generala dal svilup da la situaziun da segirezza e politica en il pajais durant ils ultims decennis. Daspera chattain nus ils svilups da legislaziuns da l’onn passà en furma da glistas da resoluziuns dal Cussegl da segirezza da las Naziuns unidas sco era rapports dal secretari general e dal cummissari dals dretgs umans da l’ONU. A quels èn agiuntads documents d’Amnesty International. Las differentas operaziuns militaras che vegnan fatgas en il pajais, èn era registradas, sco era ils acturs che na fan betg part a la regenza dal stadi, oravant tut ils Talibans. La pagina propona pia in panorama cumplet en il rom giuridic, en il qual ha lieu – u duess avair lieu – il conflict afgan. Per vegnir enavos en nossas regiuns: ins sto menziunar che la Svizra è era sin la glista fatga da giurists. Ella è participada a differentas convenziuns internaziunalas.
Quellas chattais vus sin la pagina ch’è deditgada ad ella. Ma vus chattais era rapports davart la situaziun da protecziun dals individis en il pajais, tranter auter quels dal Comité da las Naziuns unidas davart l’eliminaziun dal rassissem. La pagina descriva plinavant las contribuziuns svizras a las operaziuns da pasch da l’ONU, l’activitad da la Swisscoy en il Cosovo u era la giurisprudenza dal Tribunal militar svizzer. Ella cuntegna divers links tar las autoritads federalas, las organisaziun internaziunalas e las NGO. Ina pagina cumpletta, confurma als fatgs, bain documentada ed utila; nus recumandain ella absolutamain a tuts, pertge che la protecziun cunter l’arbitrariadad vegn surtut fatga grazia a l’infurmaziun.
http://www.adh-geneva.ch/RULAC
Cla Pedrett
|
Comments