|
 eCHanges è in forum academic, online e pluriling che vul promover il barat cultural tranter las differentas regiuns da la Svizra. Quest novnaschì en la cuntrada da las medias è sa sviluppà or dal giavisch da reunir en in project da gasetta online studentas e students da tut il pajais – independentamain da lur universitad, lur provegnientscha e lur lingua. Scuvrin pia ensemen en quest emprim editorial ils tratgs caracteristics d'eCHanges - per as mussar che quest project è surtut voss project.
Tut las domenas da studi han plazza en la gasetta eCHanges, che sa cumpona da set rubricas differentas ed originalas:
Panorama skizzescha l’actualitad internaziunala, europeica e svizra.
Thema cumpiglia vossas lavurs da retschertga davart temas da las scienzas natiralas sur l’economia e l’istorgia fin tar la medischina.
Erasmus è ina rubrica redigida cumplettamain da students svizzers che fan in segiurn a l’exteriur: ina pussaivladad unica per descriver la situaziun actuala da ses pajais ospitant.
Il Quart metta l’accent sin la « quarta Svizra »: ils artitgels da questa rubrica vegnan scrits tuts per rumantsch.
Media è ina revista da pressa en las linguas originalas da las medias da lingua tudestga, franzosa, taliana, rumantscha ed englaisa.
Portfolio sa cumpona da dossiers da fotografias, video, calligrafia e caricaturas.
Ed Agenda registrescha ed analisescha l’activitad culturala ed artistica contemporana.
Il project na po betg vegnir realisà senza vossas contribuziuns: quai vul dir, el è voss project. eCHanges è in forum academic che preschenta infurmaziuns basadas sin bunas cumpetenzas – vossas. Sche vus daventais reporter e tramettais regularmain artitgels che tractan voss roms da studi, contribuis vus a realisar il project, a far viver la gasetta. La Svizra ha dapli e dapli studentas e students – e precis uschè blers talents che pon parter lur enconuschientschas cun il public. Per far quai als ha mancà in instrument – eCHanges è damai exact quella plattafurma che vus pudais duvrar per publitgar vossas lavurs da retschertga en voss rom da studi. Sco gasetta academica che vul porscher infurmaziun da qualitad als lecturs, publitgescha eCHanges betg ina seria d’artitgels divertents per passentar sairas allegras. Anzi, ils artitgels stimuleschan reflexiuns pli profundas. Tut dependa da vus!
eCHanges è surtut ina pagina d’internet – in nov med per il qual la tecnologia furnescha ina buna interfatscha ed in’utilisaziun rapida per ils reporters sco era per ils lecturs. L’internet è fitg adattà per quest project, perquai ch’el surmunta las barrieras culturalas – en noss cas permetta el da surmuntar la barriera linguistica per crear in’unica gasetta per diversas linguas. Cun intgins clics vegnis vus tar las differentas rubricas u vus pudais trametter vossa proposta d’artitgel e daventar cun quai reporter d’eCHanges. I dat tantas pussaivladads per sa participar a la gasetta!
eCHanges è era in project linguistic. El cumbatta cunter la tendenza dominanta dal “all in English” per far rescuvrir las studentas ed ils students l’impurtanza dad enconuscher la lingua dal vischin. Uschia occupa mintga lingua naziunala in plaz tuttina impurtant en la gasetta. Sco consequenza po mintga reporter scriver en la lingua ch’el giavischa. Ed il lectur e la lectura han la pussaivladad da leger artitgels en pliras linguas – ina vaira intimaziun al plurilinguissem! En realitad n’èn betg tut las linguas egualas: il rumantsch, causa a ses status sco lingua minoritara, survegn ina rubrica entira. Pertge pia discurrer englais, sche nus avain a disposiziun quatter linguas? Duvrain pia ellas per simplifitgar nossa communicaziun!
E per finir l’editorial in pled tar la finamira: sco ch’il num di, è la finamira da basa dal project il barat cultural. Cun questa finamira s’avran duas pussaivladads a vus. Vus pudais d’in maun decider da contribuir regularmain a la gasetta eCHanges ed ans trametter in artitgel da prova, quest pass as avra la porta da daventar reporter. La regla d’aur da la gasetta online: mintga studenta e mintga student po publitgar ses artitgels en ses rom da studi ed en sia atgna lingua. Da l’auter maun pudais vus daventar ina lectura u in lectur activ da la gasetta online – cun visitar la pagina. En mintga cas; faschai a partir da dalunga l’enconuschientscha da voss vischins!
|
